民政事務局局長曾德成上周帶區議會代表團去北京同天津考察，尋日返港結束一連三日嘅考察行程。曾德成尋日以區議會工作為網誌主題，大讚代表團除咗拜訪國家民政部同參觀當地社區外，仲有會見國家領導人。網誌後段亦有提及十八區社區重點項目計劃，不過就絕口不提計劃進度緩慢，部分工程甚至連今屆任期完結前都未做得完，佢唔講，唔知係唔係唔想講呢？
曾德成喺網誌中大談港府近來銳意加強地區行政嘅決心，話民政局去年年尾分別喺港島區、新界東、九龍區及新界西舉行四場專題論壇，希望加強政府同區議會之間嘅溝通，推動發展地區行政。
至於社區重點項目計劃內容同進度，曾德成就話現階段各區議會已經就計劃達成初步共識，並已向民政事務總署呈交初步建議，而葵青區嘅項目仲已經喺上周提交立法會民政事務委員會討論。既然葵青區已經做好功課，唔知其他區做成點呢？局長又使唔使向市民解釋一下呢？
卓妮