中環出更：「大家族」歎茶怪醫享天倫
三年抱三嘅立法會醫學界議員梁家騮堪稱政界多仔公，太太關天燕臨盆在即，騮哥不忘慰妻，趁周日舉家去中環歷山大廈間一間餐廳High Tea，一人柯打一碟意粉，溫馨到極。之前單身多年嘅騮哥，忽然愛熱鬧，佢話只要太太喜歡，生多幾個都無所謂喎。
仔女仲細，加上太太腹大便便，騮哥出街都要帶埋兩位外傭湊仔，認真大陣仗。一行六人坐低，快兩歲嘅大仔好乖巧，坐低陪爸爸媽咪食包包，食飽就咬奶嘴東張西望，自得其樂。一歲細女就扭計啲，唔肯坐定，雖然行步路都未穩，偏偏扭計要落地行，工人只好扶住梁小姐學行。平時嚴肅嘅怪醫，見到仔女就冧爆，食緊嘢都扮鬼臉逗囡囡笑，又離遠揮手打氣。預產期係下月中嘅梁太，穿上緊身運動裝仍難掩八個月身孕。
梁太呢胎懷B女，好擦得，仲柯打一杯凍飲，無戒生冷嘢。一家人聚餐一粒鐘左右埋單走人，騮哥拖大仔漫步商場，工人就抱住囡囡跟尾，但佢哋對減價中的名牌店無乜興趣，只係欣賞周日中環街景。騮哥話，難得放假，享受家庭樂。
新春留港迎B女
問佢會否為太太接生，佢笑言唔係婦科，交畀其他醫生操刀嘞。目標到底想生幾多個？騮哥就話隨緣。為迎接新家庭成員來臨，新春都係留港過新年，唔出門喎。
卓妮