政情：促規管發射站 阿王有「基」心？
香港電視網絡主席王維基早前宣布啟動「Plan B」，鐵定今年七月一號開台，但就因為發射站問題遇到阻力，隨時變冇殼蝸牛。無獨有偶，立法會議員王國興（阿王）將會喺本月二十二日大會上提出動議辯論，促請政府加強規管流動發射站，莫非阿王係想針對王維基？
話收到街坊投訴
阿王提出嘅議案名為「規管流動電話發射基站，保障市民健康」，要求通訊事務管理局盡快檢討審批裝置手機基站嘅程序，並規定喺審批有關嘅新申請或續期申請時，通訊局必須事先諮詢受影響居民嘅意見。不過，阿王強調呢個議案絕對同王維基無關，事關佢早喺去年收到唔少港島區居民投訴，話受到發射站射頻幅射影響，出現耳鳴、頭痛、失眠等徵狀。
佢又話，環保署同通訊局等政府部門互相推卸責任，話發射站產生輻射唔關佢哋事，搞到佢嬲到決定臨時抽走原先諗住討論嘅單肢傷殘議案，改為喺提出呢個議題，令有關當局冇得唔正視問題。