政情：田少偷雞高永文截胡
立法會財務委員會（財委會）尋日上演兩齣好戲，先有環境局局長黃錦星宣布撤回擴建堆填區嘅前期撥款申請，後有漁業持續發展基金差啲唔夠票而化為烏有。漁業持續發展基金之所以差啲搞禍，有傳係因為同政府有唔少牙齒印嘅自由黨黨魁田北俊（田少）公報私仇，四出游說泛民主派反對所致。不過，好彩食物及衞生局局長高永文及時發現呢個陰謀詭計，急忙召回建制派議員歸位投票，議案先至可以有驚無險成功通過。
食衞局派副局政助箍票
自從特首梁振英（CY）上任後，自由黨已幾近變成反對派，先係喺立法會向CY提出不信任動議，後來仲支持引用《立法會（權力及特權）條例》徹查免費電視發牌風波。咁啱之前好多官員又因有要事缺席該黨黨慶，唔知田少係咪因此懷恨在心，尋日喺財委會討論漁業持續發展基金前夕，特登游說泛民各黨派唔好支持政府建議。眾所周知，成立漁業持續發展基金係CY嘅競選承諾之一，田少咁做擺明係想剃CY眼眉。
據聞食衞局中人得悉田少嘅計謀後，即時派出副局長陳肇始同政治助理陳凱欣去立法會游說泛民改變初衷，可惜泛民議員心意已決，議員梁家傑仲講到基金擺明係補貼漁農界嘅政治酬庸，又承認田少喺投票前有游說佢哋投反對票。不過，據聞當局都成功爭取公民黨兩個議員改投贊成票，但兩人最終離席唔投票。
小組會討論時無人反對
雖然泛民、自由黨同工業界林大輝大力反對動議，但財委會最終都係以廿九票贊成、廿三票反對，通過撥款申請，高永文會後不斷同建制派握手多謝佢哋坐定定投票，漁農界何俊賢對泛民反對感到意外，話議案喺小組委員會討論時無人反對，唔明大家點解去到財委會先至轉軚。其實唔使畫公仔畫出腸都知乜事啦！不過，田少否認係向CY報復，話投反對票係因為政府只派錢畀漁農界，如果政府下次成立紡織業同飲食業基金，佢哋一定會支持喎，真係乜都佢講晒。