中環出更：陳智思咳唔停 「執劑」斷尾
早前聖誕旅遊旺季，好多政界中人都飛往外地叉電，有啲專登去歐洲過白色聖誕，但行政會議成員陳智思（Bernard）就掉番轉，一家大細飛去澳洲「避寒」。我哋早前撞到Bernard，見佢喺室內都掛住頸巾，原來佢去完旅行後就病病哋，仲搞到有兩聲咳，最後都要靠睇中醫先斷尾。
食西藥冇乜好轉
Bernard話，去旅行期間已經感覺到唔係幾妥，喺澳洲嗰邊都有食西藥頂住，但依然冇乜好轉，晚晚瞓覺時都咳唔停。本身係泰國華僑兼夾鬼仔性格嘅佢，病咗從來都睇西醫，但唯獨係咳就要靠中醫醫治，所以佢由澳洲飛返港後，即刻嗱嗱聲去浸會醫院睇中醫，醫師幫佢執劑中藥，仲煲埋藥畀佢飲，即時好番好多。
佢話，睇西醫最少都要幾百元，但睇中醫幾十元就搞掂，而且真係有效，有覺好瞓。雖然病咗，但Bernard體重不跌反升，佢話由於澳洲甜品好正，今次假期狂食甜品而肥咗三磅。其實都唔怕啦，佢咁鍾意做運動，每日跑多幾轉已經減番磅。
卓妮