政情：李嘉誠基金會「愛心進行曲」扶弱
政府投放大筆公帑提供社會福利服務，但向來以青少年、家庭等綜合單位為對象，對個別群眾嘅支援就未夠到位，需要社工諗計「補漏」。李嘉誠基金會推出嘅「香港仁 愛香港」第二期首個公益行動「愛心進行曲」，就將改善社會民生嘅「指揮棒」交畀社工，由社工提交建議，交由業界投票，並加上市民「讚好」參與，齊齊譜出呢支愛心進行曲，填補社會支援嘅空隙。
讓社工建議 方敏生讚好
社會服務聯會（社聯）前行政總裁方敏生亦對計劃概念「讚好」，佢話計劃內嘅三百六十項建議不乏創新諗頭，兼照顧被忽略嘅對象，好似有機構建議為退休男士同不育夫婦提供治療，連為吞嚥困難嘅病人改善傳統糊餐賣相，重拾進食樂趣嘅建議都有。
目前網站已收集市民逾三萬七千個「讚好」，仍然未行動嘅市民，可以趁周六前到「愛心進行曲」網站（www.lovehkyourway.org）向啱心水嘅建議「讚好」。註冊社工更可到網站投票，決定邊九十個建議可獲基金十萬元贊助，而首二十個最多「讚好」嘅獲選項目，仲可獲基金會加碼資助額至二十萬元添。