中環出更：張建東羅康瑞演「楚河漢界」
機場管理局董事局早前曾為機場北土地用途問題爆爭拗，瑞安集團主席羅康瑞憤而辭去機管局基建規劃委員會主席一職。咁啱尋日佢同機管局主席張建東（Marvin）出席同一個論壇，前後腳到場後就各自同在場嘉賓寒暄，過咗一陣終於聚頭，雙方握手同傾咗兩句，Marvin仲拍一拍羅康瑞嘅膊頭，表現得好老友咁。不過，之後兩人又隔住條走廊嚟坐，十足「楚河漢界」，全程零交流。
之後羅康瑞喺論壇上發言好激動咁，提出香港一連串嘅問題，莫非因為最近發生嘅機管局爭拗事件，所以要宣洩一下？卓妮就趁中間休息時間問佢做乜講到咁激氣，佢就回應話唔關機管局事，只係覺得依家社會對政治太敏感，而且要配合大會主題，所以希望同參加者探討吓呢啲議題喎。
卓妮仲發現Marvin仍然全程棟住支拐杖，佢透露早前接受髖關節置換手術後，以為康復可以繼續打高爾夫球，點知打波後又舊患復發，依家又要用拐杖行路及多加休息。
卓妮