中環出更：名人食譜教你米嘥嘢
香港人一向識食，導致每日廚餘數量相當驚人，相當於約二百架巴士嘅容量。環境局局長黃錦星同周中、余健志（Jacky Yu）、Kit Mak等十多位城中名廚及名人，為響應「惜食」風氣，早前應環保團體邀請親身為市民製訂環保食譜，諗計盡量善用食材，將每日嘅餸頭餸尾，重塑為一碟碟色香味俱全嘅菜式。
環保團體地球之友近日邀請咗十二位城中名廚及名人，分享自家廚餘食譜，並收錄於新出版嘅《食得唔好嘥》食譜內。其中黃錦星亦首次撰寫食譜，教市民煮一道名為「米嘥嘢」嘅菜式，以冷飯、西蘭花莖、乾冬菇蒂、西瓜皮等家常剩餘材料，湊合成一道健康低碳嘅素炒飯，務求「食得唔好嘥」。
雖然黃錦星首次寫食譜，但佢向來喜歡在家親自下廚，寫食譜自然有文有路，菜式簡單易學，更連平日甚少用來作菜嘅西瓜皮都能善用，西瓜皮味道清新，學識煮呢道菜後，夏天就可以減唔少廚餘。此外，周中、肥媽Maria Cordero、Jacky Yu、網絡紅人cooking hayhay及米芝蓮食肆主廚曾國生等均有參與撰寫環保食譜。而其中五位大廚更親自參與拍攝教學短片。
周中示範「內衣」入饌
廚藝了得嘅周中師傅搞笑形象深入民心，在烹飪教學短片中示範如何能將一個柚子「食到盡」嘅時候亦不忘發揮幽默本色，與嘉賓主持陳淑莊大放笑彈，教大家用盡柚子嘅「外衣」（柚皮）及「內衣」（包裹柚肉嘅半透明膜）製作菜式，將整個柚子由外食到內。
卓妮