地署評估出錯 居民日日食塵
地政總署工程疑評估出錯，連累居民受罪！沙田排頭村正進行斜坡修葺工程，每日有大量塵土飛揚，民居亦受沙塵暴入侵，有居民指事前未接獲動工通知致未能做好預防工作，不但植物枯萎，連新裝冷氣機亦告報銷。立法會議員與區議員均狠斥當局未有為工程做好評估及監督工作，要求部門就事件負責，避免重蹈覆轍。
「有日聽到轟轟聲先知有工程做緊，初頭仲以為冇乜影響，點知原來佢哋冇搵嘢冚住就開工，搞到啲沙塵周圍飛！」排頭村村民黃小姐早前發現家居對落斜坡進行工程，惟事前對工程內容一無所知，自「沙塵暴」來襲後不但「日日食塵」，盆栽亦告枯萎，未料向地政署反映後，對方竟不以為然地說：「有好大塵咩！」且未擬作任何補救措施，由於黃小姐堅持影響甚巨，對方始於工程範圍鋪上帆布。
新冷氣機封塵損壞
鄰居黃先生聞悉黃小姐向記者大吐苦水，即時表達不滿：「就算日日抹個煮食爐都係鋪晒塵，依家連地下都裂咗成吋，等個工程完咗唔知會唔會連屋企都震爛埋！」至於莊小姐則質疑當局未有做好評估工作，令居民未能及早準備，「我部冷氣機新買咗成萬蚊，乜都冇講句就開工，啲沙塵搞到部機壞咗，都唔知可以搵邊個負責？」莊小姐要求地政署負起全部責任。
地政總署發言人表示，涉事地段去年九月發生山泥傾瀉，遂安排維修工程，包括於斜坡上安裝泥釘以加強穩定性，工程預計今年四月底完成。發言人續稱，施工前已跟各村代表及附近可能受影響居民達成共識，承辦商其後已於地盤範圍安裝圍板，並張貼工程內容及完工日期。
居民未能及早準備
至於居民提出屋內地台、家電損壞，以及受飛揚塵土影響一事，經初步調查後，認為未有確實證據證明與工程施工有直接關係，職員已跟居民開會解釋並採取加強措施，包括各泥釘鑽孔位置加裝帆布遮蓋，確保工程不會影響附近環境。
「斜坡修葺工程牽涉費用唔會少，點解事前唔做好受影響範圍評估？點解咁簡易嘅嘢都做得咁差！」立法會議員鄧家彪認為當局明顯於動工前未有做好評估工作，令居民未能及早預防，事後又過快拒絕承擔責任，做法並不可取。
沙田區議員衞慶祥則指承辦商與地政署均責任難逃，「事前已經同居民有共識，呢啲咁官腔嘅回應，我都識得答！」衞批評當局的防禦措施不足，令居民無辜受累，又指政府現時將大部分工程外判後，往往未有做好監督工作，要求政府吸取教訓，避免再重蹈覆轍。
文／圖：伍思明、林松澧