自從新民黨主席葉劉淑儀去年底喺沙田政團公民力量（公記）周年會慶上現身後，唔少地區人士就揣測佢哋嘅關係，直至最近有傳話佢哋會搞合併，但究竟係咪真有其事呢？據聞公記內部對合併仍存在好大分歧，大部分成員都覺得公記應該發展，但唔應該放棄自己個名，因為佢哋喺沙田就有樁腳、有實力，唔應該為咗少少資源而放棄一切，希望繼續保持合作關係。咁講法究竟係咪新民黨一廂情願呢？
有消息話，今次係西環出手撮合新民黨同公記，奈何公記做開沙田「山寨王」，冇咁易妥協。其實之前都傳過新民黨計劃同自由黨合併，但據聞大家點都傾唔埋而告吹，直至最近，又傳新民黨可能會同公記合併。但點解新民黨咁鍾意搞合併呢？據悉，因為有黨內高層希望擴闊新界東嘅版圖，咁先可以令身兼新民黨副主席嘅現任新界西立法會議員田北辰，有足夠信心轉戰超級區議會，並讓其他後起之秀代為出選新界西。
至於另一講法，就係新民黨高層有意力捧上屆代表公記出選立會選舉嘅沙田區議員龐愛蘭，所以只要公記肯加盟，有佢哋嘅樁腳，加埋該黨名聲，嚟緊選舉可謂實食冇黐牙。呢頭「親事」最終係咪成事，相信公記內部要縮窄分歧先得。