政情：舉家聽黃梅調 CY念雙親
特首梁振英（CY）除咗鍾意耕種外，對黃梅調都情有獨鍾。佢尋日發表網誌，講起前晚趁凌波同胡錦喺新光戲院合作演出「梁祝黃梅調經典五十年演唱會」，專誠帶埋太太同兩個女兒去欣賞，感慨萬千。CY透露，自細同父母去屋企附近、位於西邊街頂嘅真光戲院睇戲，當年佢仲未識聽國語片對白，父母為咗氹佢一齊睇戲，入場前會買條蠶蟲畀佢玩，而佢父母當年最鍾意睇嘅就係黃梅調電影。
感嘆「時空人物交錯」
其實早喺前年，CY從報道得知凌波同胡錦喺台灣演出黃梅調「梁祝」，已心諗如果父母仍在生，一定會買張機票，帶兩老去台灣睇凌波嘅演出。而CY前晚同家人坐喺得以保留嘅新光、聽住曲調依舊嘅黃梅戲、想起早已拆卸嘅真光，難怪CY感嘆「時、空、人、物交錯」。
新光戲院負責人就透露，當晚CY一家同其他觀眾一齊入場，冇選行特別通道，引起一陣騷動，皆因唔少戲迷都爭相同CY合照。而CY就趁中場時入後台探班，仲應要求喺演唱會完結時，上台同凌波、胡錦一齊謝幕添！