政情：工黨為錢途 拒辭職公投

白鴿黨公文袋話諗諗先

眾所周知，學民思潮本身只係得班學生成員，喺立法會冇議席，所以想辭職都冇得辭。不過，佢哋就打算周圍約見泛民黨派進行游說，希望可以搵齊五區都有泛民議員辭職。就目前嘅形勢嚟睇，好多泛民黨派都唔敢凸個頭出來表態，只係暫時持觀望態度，好似喺立法會內各佔六席嘅民主黨同公民黨就話要諗諗先至決定。通常話諗諗先，好多時都係傾向唔參與，只係唔講得出口，實行拖得就拖。

除咗有泛民黨派要諗諗之外，工黨就較為老實同直接，講到明唔想冇咗筆議員約滿酬金，所以唔會辭職搞變相公投。立法會議員一向享有約滿酬金福利，議員可以喺任期屆滿時獲得金額相等於任內酬金嘅百分之十五，計落足足有成六十多萬元。呢筆錢都唔係一筆小數目，好似上屆泛民搞嘅五區變相公投，辭職嘅議員被選返入議會後，嗰份約滿酬金被取消，呢筆錢對於大狀議員嚟講就話冇乜所謂，但對於「窮」議員就好緊要喇。

有工黨中人透露，呢筆約滿酬金係議員競選新一屆立法會選舉資金嘅主要來源，如果因為中途辭職而冇咗筆約滿酬金，下次選舉分分鐘會因為唔夠錢而冇得參選，就算選到都搞到一身債，所以為咗下次選舉着想，都唔想貿貿然辭去議席。再者，「公民提名」獲中央所接納嘅機會微乎其微，搞五區辭職變相公投更係冇出路，與其同啲學生煲埋啲冇米粥，不如疊埋心水就政改方案尋求共識仲好過啦。