俗語話，陸雲亭睇相，唔衰攞嚟衰。一直自詡「公信第一」嘅《明報》，尋日終於死死氣認衰，刪除擺喺報頭嘅「公信第一」等字樣，自我貼金變成自拆招牌，自我安慰變成自取其辱，呢啲咪就係唔衰攞嚟衰囉！
《明報》嘅聲明話喎，鑑於中文大學最新一次調查顯示，該報公信力排名下跌，所以報頭相應修改。其實正如網民話齋，《明報》煞有介事發聲明昭告天下，可能只係懼於商品說明條例咋，否則必定繼續厚住面皮死撐「第一」。
所以話，面係人哋畀，架係自己丟。《明報》烏龍百出，錯漏多多，「更正與澄清」幾乎成為每日例行公事，又點只失落「公信第一」吖，簡直連報格都丟埋添。本報翻查歷年資料發現，《明報》每年刊登「更正與澄清」動輒過百次，淨係舊年就有八十四則新聞要「更正與澄清」，其中七十六則新聞仲要向讀者或涉事人「致歉」添。你話喇，咁都仲好意思話自己「公信第一」，《明報》究竟知唔知個醜字點寫㗎！
講到致歉，最經典就係舊年十月一日，《明報》即時新聞網報道特首梁振英等高官先後出席升旗儀式及酒會，唔知攞景定贈興，居然話「特首稍後將辭職」，引起一片嘩然。呢篇報道喺網上廣泛流傳近兩小時後，《明報》先至發表啟事澄清，承認出現重大錯誤，特首「將致辭」錯寫成「將辭職」，向讀者致歉喎。咁都得！
除咗烏龍百出，《明報》仲成日老作新聞添。當年北京奧運閉幕禮上，英國球星碧咸明明喺雙層巴士上一腳踢走個波，《明報》即時新聞網居然話佢由巴士跳落嚟，一邊踢波一邊衝向人群，成為國際大笑話。仲有吖，早前免費電視發牌事件搞到滿城風雨，《明報》為求譁眾取寵，引述所謂行政會議文件大事報道，事後港府發表聲明，指該份文件根本唔係行會文件，直斥報道錯誤，《明報》又衰多一鑊。
正所謂，人貴有自知之明。賣花讚花香唔出奇，前提係花必須真係香嘅，如果唔係，只會弄巧反拙，自暴其醜嘅咋。好像《明報》咁吖，老作當食生菜，出醜多過食飯，仲要自吹自擂，真係服咗佢。冇錯，查大俠時代嘅《明報》堅持原則，確係幾威嘅，可惜大俠一去，大樹飄零，今時今日嘅《明報》好似王小二過年，一年不如一年，再咁落去，唔只搣柴咁簡單，隨時成個招牌都拆埋添吖。不如咁喇，反正《明報》已經冇晒公信，何不索性改為《怪報》，係陰陽怪氣嘅怪吖！