政情：戴耀廷踩場 立會響警號
佔領中環行動（佔中）一直被備受批評，但原來唔只人會批評，似乎死物都想發聲。話說尋日下午近一點鐘，正當「佔領中環」行動召集人戴耀廷準備同泛民主派「飯盒會」部分議員商討佔中部署時，立法會一樓會議廳警鐘就突然誤鳴，所有升降機都即時停止運作。莫非立法會大樓有靈性，響警鐘警告戴耀廷咪搞佔中行動？
誤鳴玩殘議助
尋日升降機停止運作期間，正值午飯時間，難為唔少議員助理買完外賣飯盒，都要徒步行至少六層樓返議員辦公室開飯，玩殘好多人。而本身喺九樓開工嘅資訊科技界議員莫乃光，只係要行落五樓開會，所以佢就高呼「好彩」飲得杯落，呢啲咪就係自私心態囉。衞生服務界議員李國麟仲大講風涼話：「困升降機仲好啦，困住唔使做嘛！」睇嚟佢唔係好想撈。
立法會秘書處事後解畫，承認尋日下午十二點四十六分有樓層響警鐘，檢查後發現有維修人員喺會議廳維修攝影機鏡頭時，意外觸動煙霧感應器，引致警鐘誤鳴喎。保安喺警鐘響起後，已即時前往警鐘響起嘅位置檢查。消防處收到警鐘訊號後，亦即時派消防員到大樓協助。估唔到一個疏忽，搞到勞師動眾。