政情：中環出更：撒網撈魚 高佬賢當眾獻醜
漁農界立法會議員何俊賢（高佬賢）繼上月推出短片介紹元朗有機農莊後，尋日再有新片介紹元朗魚塘，仲教大家點揀靚烏頭魚添。短片入面，高佬賢着晒整副防水裝備，成個漁民咁款，可惜有姿勢冇實際，莫講話捉條烏頭魚，淨係撒網落魚塘已經甩晒轆，瘀爆收場。
話說高佬賢喺短片中跟漁民「就叔」學撒網，就叔先示範點樣將魚網撒入魚塘，好輕易就網咗十條八條烏頭魚、黃腳立同福壽魚上岸。喺旁邊學嘢高佬賢之後就照住就叔咁做，仲懶係科學話撒魚網同打網球嘅原理差唔多，千祈唔好用手腕力，一定要用腰力，做到腰馬合一，又話撒網時要用手指尾拉住塊鉛鐵等等。講就容易，唔知做又點呢？
拋走埋條繩
高佬賢撒網似模似樣，起初連就叔都讚佢可以搵到食，點知高佬賢突然話，「搵到食呀，不過連條繩都撒埋咗落去」，即係個魚網收唔番上岸，連個魚網都沉落塘底，認真瘀爆，之後佢再冇表演撒網喇。不過，高佬賢喺就叔嘅指導下，成功用檸檬蒸烏頭，蒸得啱啱好，叫做將功補過啦！
卓妮