二○一三拜拜你條尾，二○一四熱烈歡迎你！
舊年已經消失，新年經已來臨，新年自然有新願望，功夫茶祝各位美夢成真！
之不過講真吖，大家有冇諗過點解每逢元旦都要互相祝福「新年快樂」？其實道理一字咁淺，事關舊年不快樂吖嘛，所以就將希望寄託於未來。有錢人係唔會許願「脫貧」o架，已婚者係唔會許願「脫單」o架，正所謂人生不如意事十常八九，於是新年快樂成為人類一個集體願望。
好嘞，除咗新年快樂之外，若然最多香港人選擇嘅新年願望係「社會廉潔」，而且比率有逐年上升趨勢，反映乜乜東東芫荽葱呢？好明顯啦，正如不快樂嘅人希望快樂，渴求廉潔反映社會其實不廉潔。
二○一二年即將結束嘅時候，香港大學民意調查結果顯示，期望二○一三年香港成為廉潔社會嘅比率有百分之三十一。到咗二○一三年年底，同樣嘅民調顯示，期望二○一四年香港成為廉潔社會嘅比率，進一步上升兩個百分點至百分之三十三，創下相關調查二十一年以來嘅歷史新高。另外，有兩成三受訪者最希望香港成為公平社會。
調查機構認為，最多市民希望香港成為廉潔社會，或者因為前任特首、高官以至公職人員都涉嫌利益衝突或涉及利益輸送。等功夫茶再講得白少少啦，貪曾貪湯貪贓枉法，雙貪拍門導致香港社會變得不廉潔！
東方報業集團二○一二年初獨家踢爆，前特首曾蔭權爵士牽涉一連串貪腐醜聞，呢家嘢對於廉潔奉公嘅核心價值已經有好大衝擊啦。點不知咯喎，同貪曾關係密切嘅前廉政專員湯顯明，舊年年初又被揭發任內豪花公帑，飲宴送禮瘋狂外訪罄竹難書，令人對香港嘅廉潔信心蕩然。如果唔係貪曾同貪湯接連墮落，都唔會有百分之三十三受訪者期望二○一四年香港成為廉潔社會啦。
正如有立法會議員話齋，廉潔若崩潰，好難返轉頭。議員仲話，貪曾以至領導廉署嘅貪湯都出現貪腐行為，執法機關至今未拘捕或檢控呢一對「特區雙貪」，質疑執法機關為權貴服務，明顯包庇，冇理由海陸空大貪腐都可以逍遙法外。
新年快樂作為一個全人類嘅集體願望，實現嘅機會有幾大呢？功夫茶真係唔知道，不過如果要實現社會廉潔嘅港人渴求，辦法唔係話冇嘅。即係咁，只要廉署知恥近乎勇，唔再包庇縱容貪曾，調查唔再拖拖拉拉，將貪遍海陸空嘅大老虎繩之以法，還香港人一個公義，新年願望就有可能唔會失望嘞。
所以咯喎，功夫茶提出另一個新年願望，廉署翻生，儆惡懲奸！