政情：伍步功教路 驗鈔靠手感
近期假鈔襲港，市民稍唔留神好容易中招，點都要有幾招驗鈔術傍身。尋日沙田馬場舉行元旦日賽事，永隆銀行後人兼順德聯誼會副主席伍步功都有入場為名下愛駒打氣，佢話辨識鈔票真偽，竅門係靠手感觸摸，事關假鈔無論仿得幾咁真，一摸就知真假。除咗憑手感之外，佢話亦可以用眼細心睇吓水印，總之小心啲就唔會失財喎。咁大家不妨得閒數吓銀紙當消遣，練吓徒手驗鈔術喇！
永隆前董事長伍步高胞弟
伍步功係永隆前董事長伍步高嘅細佬，平時較少出席公開活動。尋日趁新年天氣好，同順德鄉里南區區議員廖漢輝一齊入場玩。雖然永隆銀行已經出售畀招商銀行，但話晒伍氏家族幾代人做銀行，辨識銀紙真偽又點難得倒佢哋啲成員吖。不過，伍步功分享嘅驗鈔術，相信並非普通人喺短時間內學得識，睇嚟市民都係跟番金融管理局提供辨識鈔票真偽嘅方法會好啲喇。