政情：CY盼落實普選創歷史
二○一七年特首普選落實與否，或者係建制同泛民主派一念之間，但對於特首梁振英（CY）嚟講，呢個可能係佢歷史留名嘅黃金機會。CY尋日同二十三名「小特首」學生喺禮賓府聚會後，發表網誌時表明好想香港日後教科書同歷史書記載香港有史以來首次普選特首，係由佢本人做特首時落實嘅，當然呢件事係咪可以成真，依家仲係言之尚早。
此外，被外界視為挺梁嘅社交網站群組「港人講地」尋日爆料，原來CY同一眾「小特首」會面期間仲有「小插曲」。話說呢班「小特首」為趕住同CY會面，連午餐都食唔切，CY即時請人預備雞批同蛋撻等食物畀佢哋「醫肚」。
晤「小特首」 講冷笑話
不過，據聞炸薯條原本都係食物選項之一，只係有小特首怕生暗瘡而婉拒，CY隨即主動講「冷笑話」話，「你冇聽過咩？明槍易擋，暗瘡難防呀！」令到在場人士都哄堂大笑打破隔閡。此外，CY又向「小特首」打氣，希望將來嘅特首愈來愈年輕，最好係四十幾歲就做到特首喎。