政情：枉邀入行會 成員頻避席
近年爆出唔少高官同行政會議成員嘅利益衝突問題，令唔少行會成員聞風喪膽，咩都要申報一餐。據聞行會秘書處發現有乜唔妥，都已經好識做「溫馨提示」一眾成員要申報，甚至要求佢哋就可能涉及利益衝突嘅議題避席，冇得討論及投票。十幾名非官守議員中，立法會議員李慧琼（Starry）差唔多每次開會，唔係申報利益就要避席。如果啲成員下下都要避席，咁邀請佢哋入去做乜呢？
李慧琼幾乎唔使投票
按道理，Starry又唔係大商家，亦唔係坐擁大批房屋土地，點解佢要經常避席呢？原來佢一直幫緊四大會計師行之一嘅畢馬威做「資源培訓總監」。由於畢馬威係好多地產商、大企業嘅御用核數公司，大家都知道，政府每一個決定，十之八九都會涉及呢啲大企業，作為畢馬威員工嘅Starry，好多時候唔只申報利益咁簡單，直情連票都唔使投就走得。
其實申報利益呢個規矩已經實行好耐，只係今屆政府雷厲風行，行會秘書處每次都作出「溫馨提示」，搞到部分成員例如李國章、史美倫，好多時候都因為避席而冇得投票。李國章係唔少公司嘅非執董，本身更持有港九新界多幢物業，每逢討論到涉及地產政策時都要申報。至於史美倫就多數申報家族利益，聽聞佢喺免費電視牌照一役上，都要避席禁止投票。
每次開會搞申報費時
講到持有土地，點少得行會內嘅鄉事代表張學明呢？佢喺大埔有五幅土地、一幅農地，另外又喺荃灣、天水圍同大埔有商舖，所以每次討論新界東北發展時，基本上佢都要避席，連發表意見都唔得。其餘行會成員如林健鋒等商界人士，雖然唔使點避席，但都要經常申報利益，總之每次行會開會時，只係搞呢啲利益申報都用咗好多時間。
俗語都話水清則無魚，當初搵咁多唔同界別人士加入行會，都係想廣納意見，但個個都因為本身背景而避席唔發言同投票，咁又有咩意思呢？唔通真係好似上水鄉事委員會主席侯志強話齋，要搵啲冇物業、乜都冇嘅「廢人」加入行會？