中環出更：黃友嘉反駁「建制派分裂論」
中央政策組前首席顧問劉兆佳自從做咗全國港澳研究會副會長後，每隔幾日就會上電台講東講西，最新言論就係話港府同建制派未能團結一致，而建制派內部亦分裂，開始引起中央關注。廠商會前會長黃友嘉尋日接受電台訪問時，直言唔太認同呢個講法，但認同建制派唔夠團結係事實，但就只係「某啲個別人士」嘅矛盾，因此唔可以代表成個派別喎。
不過，黃友嘉喺去年特首選舉期間，係首批開腔支持前政務司司長唐英年嘅政界中人，反而及至特首梁振英（CY）去年七月履新後，黃友嘉疑似改為撐CY，加上本身做公職亦有板有眼，自然獲得現屆政府重用，難怪佢喺訪問期間都撐CY嘅施政方向無錯喇。
此外，身為扶貧委員會社會參與專責小組主席嘅黃友嘉，喺訪問期間也有談及青年問題，自言依家社會上好多工種都有發揮空間，例如電梯維修工人等，只係依家啲後生仔「太揀擇」，變相「有工冇人做」。不過，主持人就反駁話，一般藍領工種嘅人工都唔高，去年電梯維修業仲因為咁爆發幾次工潮，因此年輕人先睇唔到遠景，真係窒到應一應。
卓妮