中環出更：快閃歎茶 民主阿婆遊行做騷
香港政圈每逢有大事發生，「搞事四人幫」都例必出動攪局，尋日元旦遊行都唔例外，但今次唔見壹傳媒肥佬黎、「李漢奸」李柱銘同教區前主教陳日君，只得不甘寂寞嘅「民主阿婆」陳方安生唱獨腳戲。之不過早有遊行快閃去恤髮前科嘅民主阿婆，尋日陋習再現，喺維園參加完「佔領中環」行動（佔中）發起嘅全民投票後，就去咗飲茶睇電視，之後先至施施然打尖返入遊行隊伍，遊行遊得咁Hea，都係博見報居多。
民主阿婆尋日中午去咗維園佔中票站投票後，隨即接受傳媒訪問博上鏡，但之後就冇喺維園等遊行出發，反而急急腳快閃。卓妮於是問吓民主阿婆離開維園之後去咗邊啦，佢嘅隨行人員就話，原來佢急急腳走人係為咗去歎茶食點心，飲飽食醉後仲返咗由佢起壇嘅「香港2020」摩頓台辦公室睇電視，見到遊行人士喺維園出發先至再出動。直到下午三點幾鐘，民主阿婆就喺摩頓台打尖插入遊行隊伍，隨行嘅仲有幾個「香港2020」成員。
戴黑超挽名袋似行街
相信大家都記得，○七年泛民主派搞爭取二○一二雙普選遊行，民主阿婆行咗十幾分鐘就去恤髮，結果被市民狠批。唔知係咪前車可鑑，尋日佢恤好髮先出來，仲戴黑超，兼挽住個貴價名牌手袋，真係似行街多過遊行，仲驚死睇佢唔到咁，沿途又派貼紙又搵人影相，阻住晒遊行嘅進度，搞到警察要去維持秩序。如果大家事後想起遊行期間遇到停滯不前，咁就去問民主阿婆點解喇。
當民主阿婆行到灣仔警察總部附近就諗住閃人，點知佢懵盛盛喺遊行路線附近截的士，但嗰陣時邊有咁易截到的士，仲要等咗五分鐘先醒覺，之後佢就改去太古廣場三期一間咖啡店坐低飲嘢，坐咗十五分鐘先再沿皇后大道東嘅天橋落駱克道截的士走人。民主阿婆參加今次遊行，前後茶都飲咗兩轉，搵的士搭都行咗一段路程，如果咁好腳骨力就行埋落遮打道啦，所以佢係咪借遊行做騷博上鏡見報，大家心中有數喇。
卓妮