叫得做紀律部隊，理論上應該係非常之咁守紀律，上司帶頭向北敬禮，下屬唔會屁股朝西。之不過家陣出現咗亂哄哄嘅怪現象，紀律部隊愈來愈不守紀律，下屬甚至以玩嘢嘅手法同上司搞對抗。
例子之一係入境處人員，十月底懷疑不滿工作繁重而集體請假，導致深圳灣口岸逼爆人潮。
例子之二係駐守機場嘅海關人員，十二月十五日發起一場猶如「兵變」嘅集體請假。
因乜事幹入境處同海關要玩嘢呢？簡單咁講係管理不善，上司下屬唔係和睦共處。好似海關咁吖，前線人員不滿新上任嘅管理層不顧人手緊絀，照樣增加工作量，所以透過集體請假嘅方式表達訴求，佢哋話若然管理層再唔正視問題，不排除會喺出入境高峰期再次發起行動。
管理不善其實係紀律部隊嘅通病，所以就有例子之三嘞。消防處控制組十二月亦有六名前線人員懷疑不滿上級管理失當，不堪工作過量而集體請假，少咗三分一人手接聽九九九報案電話，迫使處方要調派其他組別人員頂更。
眼見紀律部隊上下不和，竟然出現狗咬狗骨嘅情況，納稅供養公僕嘅廣大市民當然有意見啦。「東方報業民意調查」結果顯示，對於海關集體請假表達訴求，五成二受訪者歸咎管理層冇對症下藥，冇解決長期人手不足問題；兩成六批評官僚作風令問題爆煲；一成七擔心出入境工作受影響。萬一出入境高峰期真係行動升級點算好呢？三成八受訪者擔心影響旅客；三成四憂慮抗爭行動蔓延至其他部門；兩成三恐怕邊境第一道防線變得鬆散。
除咗集體請假之外，消防處亦被揭發有二十八人集體秘撈，你估管理層點樣處理吖嗱？好明顯係大細超，只有五個見習炒魷魚，其餘相關人等或者譴責兩句算鬼數。處理方式並唔係一視同仁，四成受訪者認為當局應該加強監管紀律；三成九覺得懲處欠公義；一成八批評咁嘅做法好難起到阻嚇作用。
喂喂喂，紀律部隊係維持治安嘅力量，籠裏雞作反丟人現眼都仲係次要，如果導致治安混亂就大件事嘞。民意調查結果亦顯示，四成四受訪者認為紀律部隊不紀律，反映管理公務員漏洞百出；兩成八覺得會損害公務員形象；兩成四擔心會為社會帶來不穩定。
計功夫茶話齋，既然人手不足係衍生矛盾嘅導火線，紀律部隊管理層確係唔可以唔正視喎。假如紀律部隊嘅管理質素繼續差落去，後果將會係親者痛而仇者快，最開心嘅係目無法紀嘅犯罪分子！