自從政改展開諮詢，基本法委員會一眾成員就逐一出嚟解畫，其中講到政黨提名同公民提名都偏離《基本法》。不過，白鴿黨或者唔想被其他泛民認為唔係朋友，該黨單仲偕（銑雞）尋日仲繼續死撐，話公民提名同政黨提名方案有幾好，又話佢哋其實願意同北京商量，但如果提名過程有篩選，就一定得唔到立法會支持喎。其實泛民各黨派不如早啲傾掂咗先啦，團結就是力量吖嘛。
𠜎雞尋日喺一個英文電台節目上寫咗有關佢對政改嘅睇法，首先話雖然港澳辦主任王光亞講過公民提名偏離《基本法》，但佢哋相信根據《基本法》第廿五及廿六條規定，港人有平等權利，且有被選舉權、提名權同投票權喎。至於政黨提名，佢就話呢個方法唔單止可推廣政黨政治，仲可令特首有更高政治能量。而香港只要推廣政黨政治，先可有個公平、公開且有競爭嘅制度。
其實講乜都係假，到咗方案提上立法會數票時，就會見真章嘞。有唔少人都認為歷史會重演，白鴿黨會支持政府嘅方案，到時睇下點囉。