政情：鬍鬚曾借學者過橋
每逢星期日又係諸位局長變身「鍵盤戰士」嘅時候，正籌備二月財政預算案嘅財政司司長曾俊華（鬍鬚曾）近日走勢凌厲，除咗一如既往獨沽一味「靠嚇」外，仲特別製作一套十條嘅「Johnny財政博客」短片，繼續隔日就「吹風」唔使旨意有糖派。不過，以往做開獨腳戲嘅鬍鬚曾，趁尋日上載網誌拉埋學者落水，大談有學者提醒佢要調節香港對公共財政嘅理解同預期，仲話肯定咗自己近年嘅想法，擺明借學者對手往自己塊臉貼金。
「肯定了我近年的想法」
鬍鬚曾尋日更新網誌，透露早前趁預算案諮詢會同長遠財政計劃工作小組兩位學者見面，引述二人話深入了解過香港嘅人口老化速度同經濟數據後，都不約而同對香港財政感到憂慮，提醒鬍鬚曾要提早下工夫，特別係調節一下公眾對香港公共財政嘅理解同預期，實際意思真係可圈可點。鬍鬚曾仲話呢番話「肯定了我近年的想法」，大條道理攬住七千幾億元財政儲備唔放。
網誌又話，隨着香港經濟增長放緩，勞動人口比例下降導致收入減少，與此同時老年人口增加，各項屬基本福利嘅經常開支只會有增無減，要設限亦唔容易，警告終有一日，政府需要動用財政儲備去支持公共開支，又警告儲備總有用完嘅一日，政府到時一定要增加收入，例如加稅或發債維持收支平衡。
搵肥亨幫手 唔搵陳家強
不過，鬍鬚曾即時補鑊話，相信呢啲情況唔會短時間內出現，但「總有一天會來臨」，有需要話畀公眾知問題嘅嚴重性。換言之即係恐嚇港人總有一日會冇飯開，但呢刻短時間內唔會出現，真係「又要威又要戴頭盔」。
鬍鬚曾又就預算案為傳媒舉辦工作坊，除咗搵到庫務科同事教書，仲搵咗老友前財經事務及庫務局局長馬時亨（肥亨）分享制訂預算案嘅經驗，仲透過網誌「拉客」，呼籲多啲記者參加。不過，奇就奇在點解要搵已經離職五年嘅肥亨落場呢？就算副局長梁鳳儀（Julia）即將離任，唔通現任局長陳家強經驗未到家唔夠資格？