政情：中環出更︰榮智健范鴻齡 馬場各有各睇

年前因公司爆出炒燶Accumulator導致虧損嚴重嘅中信泰富前主席榮智健，沉寂多時後，尋日突然現身沙田馬場，捧吓新愛駒「飛影」場。佢入場後一個箭步走入馬會董事廂房，偶爾行出廂房露台觀賞賽事，睇嚟心情唔錯。與榮少同場現身嘅，仲有同樣捲入醜聞嘅中信泰富前董事總經理、前行政會議成員范鴻齡（Henry），兩人同台睇馬卻未有交頭接耳，而係分隔幾十米，喺露台各有各睇，不過榮少回應我哋嘅問題時就話同Henry仍有聯絡，可見賓主情誼仍在。