街坊：唔幫手咪變幫兇？

鄰舖店員 小便變捉賊

遭三匪「光顧」的錶行對面的糖水舖，目擊案發的姓蔡（廿三歲）男職員表示：「我嗰時準備去廁所，突然見到三個戴晒口罩、Cap帽同手套嘅男人，有個仲拎住大鐵錘，當時已經覺得古怪。」未幾，他即聽到「嘭」一聲巨響，「我見到兩個男人掃咗批錶落個袋度就即刻跑走，幾個人好快就追佢哋。」

對於自己首次撞破有人「食大茶飯」，蔡表示當時內心曾有一絲恐懼，但正義最終戰勝恐懼，伸出援手，加入追賊行列，他稱：「當時都驚驚哋！但目擊有罪案發生，無理由仲施施然企喺度，或者走咗去掛，咁咪變咗做幫兇？」他坦言沒有考慮到賊人有否攜武器，或追賊的危險性，「我即刻追出去，仲嗌其他人幫手。」幾個街坊聞聲加入追捕，各人終合力將其中兩個賊人制服，個老闆亦趕到拎番批錶。