博愛被指斷錯症皮膚敏感當麻疹

七歲的堯仔於十一月底感冒，有發燒及肚瀉徵狀，前往私家診所求醫後已退燒，惟五日後身上突然出現紅疹，即時前往博愛醫院求醫。「主要係個肚同背脊有疹，急症室醫生睇一睇就話係麻疹，我當堂嚇咗一跳！佢舊年先打咗（麻疹）預防針，好擔心佢會傳染畀哥哥！」堯母指醫院向兒子批出四日病假，一家四口亦做足戒備，以防感染麻疹。

似風瘌浮出一陣就冇

不過，堯母連日來觀察兒子的身體變化，懷疑並非感染麻疹，「啲疹好似風瘌咁浮出嚟一陣就冇，跟住會『走』去第二度，而且係一大撻、唔係一點點！」堯母遂與兒子再往私家醫生求診，結果獲確診為皮膚敏感，「原來唔係麻疹，真係搞着我哋一家！點解診斷得咁求其o架？知唔知咁樣會嚇親人？」

堯仔身體出現大片紅疹，數小時後已消退。	堯仔因身體出紅疹往博愛醫院求醫，獲診斷為麻疹（紅圈示）。	堯仔患病時序

醫管局發言人證實，病人十一月廿五日凌晨因身上出現紅疹，由父母陪同到博愛醫院急症部求診，當值醫生按當時臨床表徵初步懷疑為麻疹，情況穩定故毋須留院，病人其後未有再到醫院求診，未能就私家醫生的診斷作出評論。

「麻疹患者身體唔同部位會出一點點紅疹，會持續幾日，如果過幾個鐘就散就似風瘌多啲！如果病人喺持續發燒第四日出疹，就有可能係麻疹，好少退燒之後先出。」皮膚科專科醫生史泰祖表示，麻疹患者會出現眼紅及發燒等徵狀，容易感到疲累，正常來說，甚少會跟皮膚敏感或者其他病症混淆；病情一般持續一星期，嚴重者有機會引發中耳炎、肺炎等病。

急症醫生經驗未必夠

立法會衞生事務委員會委員陳恒鑌認為，現時公立醫院醫生有年輕化趨勢，急症室醫生未必有豐富經驗判斷不同範疇的病症，「如果醫生真係唔清楚，最好就轉介去專科門診，但依家連轉介渠道都唔暢順，加上等專科門診閒閒哋都排一年，所以係一個好頭痛嘅問題！」陳認為醫管局須增撥資源，以徹底解決問題。

圖/文：陳倩儀、馮國豪