香港旅遊景點唔多，來來去去都係嗰幾個地方，尖沙咀星光大道算係其中一個，仲被評為本港十大必遊景點之一添。本來呢，漫步於呢條全長四百幾米嘅海濱行人道，除咗可以欣賞維港風光，仲可以親近明星偶像嘅手印，的確係幾吸引嘅。不過咁，吸引還吸引，如果你見到星光大道最近居然變成工地，隨時乘興而去，敗興而返o架。
係咁嘅，星光大道懷疑日久失修，近月被建築署揭發甩皮甩骨，除咗用來支撐橋面嘅橋樑及樁柱有裂紋，而且石屎剝落，鋼筋外露，睇見都牙煙。由於聖誕及新年期間例牌有大批人潮湧入星光大道，建築署擔心橋面超出負荷，隨時發生意外，所以罕有地通知負責管理嘅康文署圍封部分地點，禁止途人進入及實施人流管制，搞到星光大道好似「圍城」咁，禁區處處，又有鐵欄，又有水馬，又有圍板，又有膠帶，簡直大殺風景。唔怪得有內地遊客質問，點解星光大道好似工地？
係咯，點解星光大道會變成工地？講起咪又係康文署管理有問題囉，如果平時保養及維修做得好啲，又點會搞到甩皮甩骨吖。今次如果唔係建築署踢爆，康文署仲係矇查查添，你話佢哋究竟點樣管理o架？好彩發現得早咋，否則聖誕及新年人潮湧至，隨時冧橋爆大鑊都似。最離譜嘅係，當局只係靜雞雞修補，到依家都冇向公眾交代，都唔知究竟想隱瞞啲乜嘢。
前年本報揭發東區走廊銅鑼灣入口橋躉移位，支路天橋嘅塑膠伸縮接縫不尋常伸展，險象環生，結果需提早進行更換工程，先至避免發生意外。今次星光大道樁柱出現裂紋，情況雖然唔同，但一樣反映港府部門辦事求其，敷衍了事。正所謂，唔見棺材唔流眼淚，港產官僚次次都要等到出事先至識得補鑊，真係服咗佢哋。
講起呢條星光大道，話就話係本港最熱門旅遊景點之一，其實得個虛名咋。呢，美國傳媒曾經選出全球十二大令人失望旅遊景點，香港星光大道名列第二，真係羞家。美國傳媒係咁講嘅，星光大道缺乏舒適嘅休息區，加上售賣紀念品攤檔林立，欠缺規劃，遊客嘅感覺就好似「噴嚏打唔出」，周身唔舒服。經過嗰次評選之後，星光大道喺國際上都可以話臭名遠揚咯。
俗語話，知恥近乎勇。星光大道淪為全球第二令人失望旅遊景點，照計康文署應該諗辦法改善至係o架，點知佢哋居然若無其事咁，結果冇改善不特止，依家仲搞到甩皮甩骨，真係醜上加醜。事實證明，港產官僚果然唔知恥！