新民主同盟立法會議員范國威（Gary）有份嘅「香港本土」，早前為咗要求港府收番內地單程證審批權而大搞「源頭減人」聯署，除咗惹起歧視新移民爭議外，身兼新同盟召集人嘅沙田乙明邨區議員丘文俊，參與泛民主派嘅反歧視聯署，凸顯新同盟內部矛盾。據講早前丘文俊喺屋邨就房協加租搞抗議行動，但Gary就喺邨口派年曆，好似陌路人咁，睇嚟新同盟內訌已經去到白熱化地步。
丘文俊話佢同Gary已起嫌隙，近期更互不相干。原來唔單止咁，有人仲「小學雞」到玩杯葛。丘文俊話，新同盟沙田份地區報已經唔會印佢嘅消息，而早前政府就沙田巴士路線問題同地區開會，立法會議員劉慧卿都有同佢哋嘅區議員一齊出席，但Gary就請都唔到，而佢託Gary代為約政府官員開會就更加係冇回音。我哋都有問番Gary搞邊科，但佢就話唔想評論喎。其實除咗丘文俊外，Gary一個助理早前離職後亦喺社交網站暗批Gary，睇嚟Gary都要自我反省吓喇。