政情：李家仁與樂團演出「明」曲
雖然聖誕節過咗，但「小明」李家仁醫生就過咗一個快樂嘅聖誕，有乜咁快樂？皆因香港業餘管弦樂團前日同中國香港青年交響樂團喺文化中心開咗個聖誕音樂會，邀請咗小明演出，而且仲係壓軸表演嘉賓添。原本李家仁唱小明歌曲好平常，但今次最特別就係以管弦樂奏出佢嘅《小明過聖誕》同《小明上廣州》兩首歌，仲要夾到李家仁嘅唱腔，可想而知難度係幾咁高喇。
李家仁話，佢係首次喺文化中心音樂廳唱歌，仲同兩個樂團共八十人同台演出，作為「歌手」真係夢寐以求，而且唱到《小明上廣州》嗰陣，台下觀眾仲一齊拍手，氣氛真係「好High」。為咗呢場演出，李家仁唔敢怠慢，前日五點放工就即刻去文化中心綵排，話咁快就夾好兩首歌。不過，十點鐘先至輪到佢出場，中間嗰幾個鐘頭都唔知點打發，出街逛又怕冷親，惟有一個人喺化妝間呆坐同練歌。
農曆新年「接財神」
雖然聖誕過咗，但李家仁仲有排忙，嚟緊農曆新年又有新歌，叫做《小明接財神》，但距離過年只有一個月，佢頭痛緊唔知點幫呢首歌拍MV，擔心趕唔切過年播出街喎。