政情：李根興南美「高飛」悟人生
職場壓力大，十大傑出青年兼盛滙商機創辦人李根興（Edwin）早前諗咗個另類減壓方法，將十一月列為「熄機月」，拒覆電話同短訊，同妹妹李鈺涵（Amy）遠飛南美「流浪」兩星期。Edwin挑戰膽量玩滑翔傘，驚覺從前孭喺身上嘅面子同重擔，原來只係一陣風。佢又大讚南美人唔算富有，卻快樂幸福，唔似香港人看似富裕，其實內心好貧困。
因為公司轉型，Edwin月前拚搏工作幾個月後，決心放個悠長假期。首次踏足南美，佢兩兄妹拎住本旅行書，遊遍巴拿馬、智利、巴西、阿根廷及秘魯。Edwin見山頭上有滑翔傘玩，於是畀咗八百港元，揹上滑翔傘一飛衝天，彈上逾千米高空，喺空中「飛行」半小時，驚覺「呢個先係我一直追求嘅人生」。
欣賞當地人夠真
兩星期南美之旅，花近十多萬港元，Edwin話，人生去過咁多次旅行，最大啟發係今次，慨嘆從前只顧盲目地衝衝衝，未有真正看清世界。
到底南美有乜魔力？一句講晒：人夠真，南美人熱情真誠，唔似香港人咁冷漠。呢份真，將Edwin融化，返港之後，朋友驚覺佢開朗咗，脫胎換骨。