政情：政改敏感時刻18區會訪京
自上屆區議會在一○年組團參觀上海世博後，事隔幾年，今屆區議會任期已過一半，終於再有機會組團返內地，而且仲係直上北京添！有消息話，民政事務局局長曾德成將聯同十八區區議會正、副主席喺下月訪京，屆時仲會好可能會獲港澳辦主任王光亞或更高級官員會面。港府正就政改進行諮詢，十八區區議會喺呢個敏感時刻上京，莫非北京想佢哋協助推行政改？抑或要傳達重要訊息呢？
有指會同領導人見面
據悉今次訪京團會喺下月九至十二號訪問四日，期間會到訪北京同天津，而按資歷應該會由身兼鄉議局主席嘅屯門區議會主席劉皇發擔任團長。其實○五年區議會亦曾經訪京，當時泛民主派都有多名代表出席，包括白鴿黨嘅謝永齡、陳家偉，佢哋仲同當時嘅國務院港澳辦常務副主任陳佐洱及副主任周波見面。不過，時移世易，今屆區議會正、副主席都由建制派包攬，故今次訪京嘅清一色都係建制派，而接見佢哋嘅可能會有更高級嘅官員。
有區議會主席透露，有人同佢哋講抵京翌日就會同領導人見面，所以千叮萬囑佢哋一定要隨團活動，千祈唔好遲到。據理解，葵青區區議會原定喺當日去立法會民政事務委員會就一億元社區重點項目進行匯報，但都因為該區區議會嘅正、副主席要上京同領導人會面，而要改派其他代表出席有關委員會會議。無他嘅，訪京見領導人唔係經常有機會，所以為咗訪京自然會有取捨喇。
不過，相比起一○年參觀上海世博遊山玩水、風花雪月，今次嘅意義就明顯重大得多。皆因今次班區議會正、副主席係直上北京，時間仲要正值本港政改諮詢期內，就連港府都叫區議會要幫手喺地區做好《基本法》宣傳同教育工作，可見區議會喺政改都有一定角色。所以話呢，班區議員去到北京唔係講政改都冇人信啦，分分鐘仲係北京要求佢哋幫手推動政改，甚至傳達重要訊息都未定。