中環出更：公民提名太急進「小特首」唔撐
政改正展開諮詢，主要由學生組成嘅學民思潮就繼續鼓吹用「公民提名」嚟揀特首候選人，半步都唔退讓。不過，一班同為中學生嘅「香港小特首」就似乎唔多撐佢哋，仲話覺得現階段最重要係大家有得普選特首，公民提名太急進，怕到時會出現混亂喎。
香港小童群益會尋日舉行第六屆「香港小特首」發表《小小施政報告》發布會，呢個活動除咗有班小特首發表佢哋以「兒童友好城市」為主題嘅施政報告外，仲搵嚟政制及內地事務局副局長劉江華做主禮。劉江華致詞時話，除咗《施政報告》，政改方面都要喺唔同角度搵到共同目標，要有商有量咁做事喎。
劉江華收「大禮」
咁呢班小特首又點睇普選特首同公民提名呢？讀緊中四嘅陳嫚堯會後同卓妮講，話一七年先係香港第一屆普選特首，似乎公民提名太過急進，擔心咁多人都有份提名，會出現混亂，建議先有普選。另一學生蘇景御就話，港人最擔心係有篩選嘅普選啫，所以最重要都係個提名委員會要有透明度，咁市民先會了解個機制及對選舉結果心服口服喎。呢班小特首似乎真係送咗個大禮畀劉江華囉！
卓妮