中環出更：養狗裝天眼名人防盜有法
年近歲晚，好多城中名人唔係出外旅行，就係晚晚參加派對，難免被不法之徒有機可乘。好似博愛醫院前副主席吳俊華大宅日前就被賊人「光顧」，損失逾百萬元財物，認真肉赤。講起防盜措施，名人各有妙計，「玩具大王」蔡志明、喜運佳鐘錶常董梁青華（華哥）不約而同養狗防賊，圓玄學院副主席湯修齊（Henry）就喺家中安裝可連接智能手機嘅攝錄裝置，令賊人無所遁形。
坐擁沙田九肚山大宅嘅蔡志明身家雄厚，自然保安措施做到足。蔡太李惠莉話畀卓妮聽，佢屋企有齊晒防盜警鐘、紅外線攝錄機，仲有多名保安廿四小時巡邏。咁仲未夠，佢哋仲養咗十幾隻大狼狗，啲狗聞到陌生人氣味就狂吠唔停，賊人休想越雷池半步，蔡家嘅保安果然夠晒穩陣。
籲勿放太多貴重物在家
華哥都對狗隻情有獨鍾，去年佢由住宅大廈搬入大埔三層高村屋時，即領養一隻退休警犬幫手看門口，依家佢屋企有一大一細狗仔，加上唔少鄰居都有養狗，所以一有陌生人行近，成班狗仔就鬥吠，家家戶戶工人亦會探頭睇個究竟，因此村內一直相安無事。華哥笑笑口話，兩隻愛犬咁聽話，所以每逢周末就會揸車帶佢哋到郊外玩，呢幾日就玩遍大帽山及粉嶺等地。
至於Henry都趁假期同太太、囡囡去馬來西亞沙巴旅行，盡興而返。Henry住喺九龍塘高級住宅區，問佢點樣確保家居財物安全，佢就話最緊要唔好擺放太多貴重物品喺屋企，最近佢仲喺屋內加裝兩個攝錄鏡頭，隨時喺手機上監視屋企情況，咁就更加安心喇！
卓妮