港產官僚最大嘅特點係大事做唔到，小事做唔好，施政係咁，基建亦係咁。
呢，港府今年初宣布向十八區區議會預留一億元撥款，推展所謂「社區重點項目」計劃，原意係繞過官僚程序，提高行政效率，加快地區建設。按照原計劃，今年三月底前就要訂出各區項目清單，點知好事多磨，磨到最近港府先至集齊十八區建議，就算下月開始排隊到立法會闖關，最快都要明年下半年先至可以向財委會申請撥款。根據一般工程快則兩年、慢則三四年嘅規律，預料呢批工程要到二○一七或一八年先至完成，即係話，隨時要橫跨兩屆區議會，問你服未。
小小地區工程啫，又唔係發展太空計劃，點解要拖咁耐呢？唉，講起咪又係人多口雜累事囉。大家唔好以為淨係立法會先至識拉布吖，區議會一樣吵吵鬧鬧，唔好得去邊嘅咋，你有你講，佢有佢講，七嘴八舌，九唔搭八，有乜法子唔一拖再拖吖。更好笑嘅係，有啲區議會雖然一早向當局提交建議，但只停留於概念性質，紙上談兵，純屬廢話；而部分工程則涉及多個政府部門，就算順利拍板，喺官僚作風之下，都唔知可唔可以如期施工。唔怪得有人擔心，工程一拖再拖，最後唔係爛尾，就係變成無底深潭，隨時要由納稅人填氹，你話係咪冤枉吖？
正所謂，一滴水可以睇穿成個世界。港府眼高手低，好心做壞事，連小型地區工程都搞到一鑊泡，大型基建工程更加唔使講喇。大家不妨回顧一下，回歸以來有邊項大型基建工程可以順利展開o架？前朝特首曾蔭權爵士吹噓嘅十大基建有邊樣已經落成o架？拖拖拉拉唔緊要，最慘係拖得愈耐成本愈高，港珠澳大橋係咁，高鐵係咁，沙中線係咁，西九文化區亦係咁，呢啲工程超支動輒數以十億元計，最後咪又係由納稅人埋單！
不過咁，亦有例外嘅。好似新政府總部及立法會大樓咁，當局坐言起行，話建就建，絕不拖泥帶水，而且話咁快就落成添，效率都不知幾高。所以話港產官僚自私囉，新總部起畀自己享受，貪曾為咗自己任內剪綵攞威，不惜日夜趕工，遲一日落成都唔得，卒之搞到甩甩漏漏；至於其他基建咯喎，咁就關人個關，話之你拖到地老天荒。
冇辦法喇，今時今日嘅香港烏煙瘴氣，亂象叢生，政府本來已經無能嘅喇，加上政客阻頭阻勢，有破壞無建設，就算有幾好嘅發展計劃，都係嘥氣嘅咋。無可奈何花落去，香港氣數已盡，講乜都假，大家最好自求多福喇！