民陣將於下周三元旦日發起爭取普選遊行，主辦單位預計最少會有五萬人參加。與此同時，愛港之聲將會喺當日下午喺政府總部發起「愛香港、繼續撐政府」嘉年華。
表面上支持政府同反對政府兩派似乎唔會有任何衝突，但保衞香港運動發起人傅振中就透露，佢哋將會喺民陣遊行期間擺街站「挑機」，順手收集支持政改方案要符合《基本法》同人大常委會決定嘅市民簽名，喺諮詢期內轉交畀政府。
傅振中話，保衞香港運動將於元旦下午三點至五點喺灣仔軒尼詩道擺街站，被問到係咪特登同民陣打對台，傅振中就以「無理由畀佢哋霸晒成條街」為由作回應，又話佢哋嘅成員唔會故意挑釁遊行人士，但就覺得大家要學習表達民主訴求，唔好動輒掀起罵戰。
民陣召集人楊政賢就話，傅振中喺遊行路線上擺街站明顯係挑釁行為，佢哋除咗會呼籲遊行人士克制外，亦會安排多啲糾察喺保衞香港運動街站附近巡視，避免出現混亂情況。