政情：政界謬論震憤民心
政圈中人好多時都係靠Sound Bite（精警發言）出位，當中部分發言可能係譁眾取寵，但亦有唔少係真心謬論。有電台搞嘅每年一度嘅聲音檔案選舉，市民喺網上投票選出最具代表性、印象最深刻嘅十大聲音片段。除咗菲律賓總統阿基諾話絕不道歉、教師林慧思事件等聲音檔案深入民心外，立法會議員蔣麗芸（Ann）嘅「結婚紀念日論」、上水鄉事委員會主席侯志強嘅「廢人論」、同「貪湯」前廉政專員湯顯明嘅「有錯會認」亦上榜。
「有錯會認」 貪湯得個講
市民選出嘅十大聲音檔案之中，香港電視網絡主席王維基嘅「邊個最大」、林慧思事件及財政司司長曾俊華話飲咖啡、睇法國電影就係中產嘅聲音檔案就分別列入三甲。至於破壞香港廉潔聲譽、打爛廉政公署金漆招牌嘅貪湯，喺立法會帳委會聆訊後見傳媒，話自己有錯會認嘅言論就排第四。雖然貪湯已被帳委會痛斥譴責，但厚顏嘅佢至今仍未道歉，難怪市民會選出呢段聲音檔案，提醒佢有負廉署同香港人。
除咗以上首四位嘅聲音檔案外，阿Ann曾經喺立法會維護特首梁振英時講嗰句：「好多男人啊，連自己嘅結婚紀念日都唔記得啦！何況個花棚！」令市民印象深刻，因而成為第五位聲音檔案。相信阿Ann呢句說話都提醒咗唔少男人要記得同太太嘅結婚紀念日，而阿Ann丈夫梁海明應該更加係走唔甩。至於美國中情局「走佬特工」斯諾登解釋點潛逃藏身香港嘅言論，以及「佔領中環」發起人戴耀廷嘅佔中言論，就分別成為第七及第八位聲音檔案。
不過，最出乎意料嘅就係侯志強今年七月喺立法會發展事務委員會公聽會上力撐發展局局長陳茂波嘅「廢人論」，佢話：「如果一個到四、五十歲，一啲物業都冇，乜都冇，呢個人都係廢人嚟o架啦！係咪？仲配咩做局長吖？」，雖然未知大家係咪認同佢嘅「廢人」定義，但呢句說話就令佢今年成功爭取入圍，打入榜末第十位喇！不過，都係嗰句，就算發言點出位都好，都唔代表言論合理同受歡迎嘅。