中環出更：葉建源杜拜過溫暖聖誕

今年聖誕節同新年都凍冰冰，好多立法會議員都選擇離港旅遊，好似教育界葉建源就趁住休會同太太去杜拜旅行避寒，仲去咗全球最高、有一百六十九層嘅哈利法塔參觀。葉建源去到塔頂暸望台時，都不忘影番張相，證明自己曾經踏足呢座建築物。

葉建源喺出發前參加旅行社舉辦嘅茶會，知道杜拜嘅冬天同香港嘅夏天無乜分別，於是就喺屋企櫃桶底搵番啲短袖衫出嚟着。雖然杜拜一年四季都好似夏天，但佢話冬天嘅氣溫又唔算太熱，着短袖衫就啱啱好。

早兩日佢哋去咗位於杜拜最大人工島上嘅亞特蘭蒂斯酒店水上樂園玩咗成日，樂園內咁多項水上設施，葉建源最鍾意嘅就係有成九層樓咁高嘅水上滑梯，話喺咁高滑落嚟非常刺激，玩極都未夠喉。佢哋之後仲走去沙漠玩四驅車，總之就要玩番夠本先返香港。

卓妮