中環出更：體驗「失明」 名人領悟人生
沒有光嘅世界，生活百般不便。為體驗視障人士嘅苦況，陽光勵進會創會社長兼黃大仙區議員丁志威（Roy）早前聯同青年團體「青藝」舉辦嘅體驗視障之旅，號召城中一班政商界傑青到美孚「黑暗中對話」體驗館，齊齊接受四十分鐘「失明」體驗，原來無眼睛帶路，簡單如買嘢、找錢，都相當艱難。
體驗今次視障之旅嘅名人，包括廠商會展覽服務有限公司副主席李慧芬（Stella）、十大傑青甄韋喬、時裝設計師余嫿（Mary）、合和項目拓展業務發展經理鄭家豪，青年工業家獎得主陳婉珊及萬希泉鐘錶董事長兼創辦人沈慧林等人。佢哋走入伸手不見五指嘅黑暗館內，由視障導賞員帶領，感受過馬路、行街市及購物等唔同場景。
喺黑暗中，每個動作都好似迷失方向，例如Mary行到口渴，想話買罐汽水潤吓喉，好唔容易摸黑拎到張銀紙出來，卻唔小心將汽水倒瀉喺地上。沈慧林買紙包飲品時則不慎跣手，銀包都跌埋，遍尋不獲，惟有大叫求助，叫同行好友幫佢摸黑搵銀包。至於Stella買飲品時，都跌咗幾蚊，認真無奈。而渾身肌肉嘅鄭家豪初嘗用「盲公竹」行路，感覺戰戰兢兢。完成黑暗館之旅，眾人都大呼啟發良多。
擬encore 摸黑食開年飯
搞手阿Roy話，準備農曆年後Encore，叫齊名人喺黑暗館摸黑食開年飯，一嘗摸黑夾餸，用味覺感受食材真味。佢亦呼籲社會更多關注失明人士，例如考慮將「八達通」裝上發聲功能，能讀出餘額，好讓視障人士買嘢時，清楚知道被扣咗幾多錢，咁就Fit晒喇。
卓妮