政情：小肥張佳節樂做「宅男」
聖誕節係普天同慶嘅日子，就算唔去旅行叉吓電，都會出街開派對慶祝，而勞工及福利局局長張建宗（小肥張）就選擇喺佳節同家人共享天倫，稍作休息。小肥張尋日喺網誌撰文話，雖然佢喺屋企「煲新聞」多過「煲電影」，但都想同大家分享吓經典電影，其中勵志電影《It's a wonderful life》講述一位畢生服務他人嘅小鎮英雄。佢忽然講起電影，其實都係想幫社署宣傳吓義工運動啫。
寫網誌關懷弱勢
難得寫網誌，小肥張當然順帶數吓自己嘅工作啦，好似喺聖誕節之前，先後探訪弱勢社群，包括喺上周三攝氏九度嗰晚，去咗上環同筲箕灣探訪露宿者，大前日亦訪問咗因為缺乏照顧而入住兒童院嘅幼兒。小肥張話，聖誕節係一個宣揚和平關愛嘅日子，鼓勵大家多啲向有需要嘅人，用行動表達關懷。一篇網誌都講到咁多嘢，希望佢嚟緊幫政府拍攝政改宣傳片時，唔好離晒題就好喇。