政情：梁宏正就做老竇乜都唔急
立法會議員梁君彥長子、菁英會主席梁宏正（Clarence）早前好開心咁同我哋分享佢首次做爸爸嘅高興心情。早兩個月，我哋喺一個公開活動再見到佢，佢興奮話囝囝將於明年一月中出世，但由於佢成日都好忙，要靠太太準備好所有BB用品，所以心感內疚喎。不過，佢話嚟緊日子，一定要好好揀架BB車同BB床畀囝囝。計起由依家至BB出世唔夠一個月，唔知佢同太太係咪已準備妥當，迎接小生命嘅來臨呢？
想砌夠「好」字
Clarence尋日就話，原來佢淨係買咗BB床，但仲未買BB車，因為仲有時間，唔使急住喎。咁幼稚園學位嘅問題又點呢？Clarence亦都話唔使咁心急，幾年後嘅事，到時先諗，隨遇而安喎。咁會唔會計劃生多一個B呢？佢就話，兩個小朋友梗係好啲啦，一仔一女砌夠個「好」字就更好喇！如果每位香港爸媽都好似Clarence咁鼓勵生育，相信港府就唔使頭痕人口老化問題喇。