政情：議員齊做大嘥鬼
港府宣傳叫大家食得晒先好買，食得晒先好嗌，唔好做眼闊肚窄大嘥鬼！點知平時最識批評政府環保政策不足、要求當局教育市民垃圾源頭分類嘅一眾立法會議員，先至係真正嘅大嘥鬼。尋日有報道話呢班議員喺立法會辦公室樓層丟棄嘅垃圾入面，唔單止搵到一盒未食過嘅番茄、一大堆未食過嘅餅乾、肉鬆及菠蘿乾等，仲有大量本應可以分類回收，但又冇放入三色回收箱嘅紙張同膠盒。
話說環保團體長春社嘅義工喺今年十一月就立法會嘅垃圾做審查，將大樓六至十樓所有議員辦公室樓層嘅垃圾逐袋磅重，再逐袋「解剖」，發現除咗飯盒、膠盒、零食、番茄仔、麵包、麥皮同仲用得嘅文具外，就連綉花鞋都有，仲要係好新淨嘅添。
十樓重災區 識買唔惜食
咁多層辦公室嘅垃圾之中，發現由工聯會、人民力量、社民連及立法會會計部長駐嘅十樓最浪費。垃圾當中有餅乾、糖、話梅、肉鬆燒餅同盲公餅等十幾樣食物，當中只有一樣係過咗期，其餘嘅都仲食得，而佢哋可回收嘅物資亦係最重嘅。其次就係九樓，即民主黨同工黨嘅辦公室，而公民黨同新民黨所屬嘅八樓就排第三。至於經民聯同自由黨所屬樓層垃圾量較少，但好可能係因為佢哋比較少喺辦公室喎。
黃國健懵然不知回收箱
幾位辦公室喺十樓嘅議員見到自己嗰層丟出嚟嘅垃圾後都耍手擰頭話唔係自己嘅。人民力量議員陳志全就話自己好少買零食，一定唔係佢；社民連梁國雄亦都話佢冇呢啲嘢。工聯會黃國健仲賴立法會冇做好源頭分類，但其實立法會每層樓都有三色回收箱，只係黃國健自己唔知啫。個個都唔認數，唔通啲垃圾自己爆出嚟嘅？不過，同屬工聯會嘅郭偉強算係老實，見到啲垃圾就大嘆「陰功囉！」仲話有見過啲盲公餅添！
其實議員每年都起碼出外考察一至兩次，好似環境事務委員會早前都去過南韓訪問，了解當地嘅垃圾分類同環保工作，但返港後竟然乜都學唔到，真係枉花公帑囉！再者，佢哋自己都唔以身作則，又邊有資格喺度指指點點批評政府環保政策做得唔好呢？