政情：中環出更：得罪財團論 珠姐急澄清
基本法委員會委員譚惠珠早前接受電台訪問時，提及特首梁振英（CY）可能得罪地產商或大財團，之後又話如果CY被人撳住唔郁得，有能力都唔易發揮出來。有關言論出街後，新鴻基地產主席兼董事總經理郭炳江就反駁話呢個講法好唔公平。珠姐可能聞到陣(火羅)味，尋日又喺同一電台澄清事件，話其實當日唔係講緊啲大財團撳住特首，而係講緊啲立法會議員。
同郭炳江互祝聖誕快樂
其實珠姐早前係話CY正好努力咁剷去啲老大難嘅問題，但喺搵地過程中，可能會得罪咗啲地產商或大財團，又話部分立法會議員或超級議員又可能認為自己認受性較特首高，以致特首施政舉步維艱，如果人哋撳住唔畀你郁，有能力都唔容易發揮出來。珠姐澄清話，當日節目主持都有問佢係咪講緊啲議員，當時佢免得對議員太尖刻，所以用默認嘅方式來表達，點知被誤會佢講緊啲大財團。
珠姐又話，近日已經同郭炳江通過電話，大家已經冇問題喇，而且仲好開心咁互祝聖誕節快樂添！至於兩人傾咗啲咩？珠姐就話除咗《基本法》嘅事，其他都唔多講。而《基本法》第廿三條應該幾時再推出呢？珠姐就話等大家都成熟啲先啦，唔使急喎。
卓妮