政情：中環出更：舉家遊韓 周國豐雪出無奈
聖誕長假期去邊好？經營床褥生意嘅社交名人周國豐（Brandon）見一對囝囝未見過真雪，日前精心安排一個三日兩夜首爾滑雪之旅。一抵埗，睇見白雪皚皚，Brandon同太太黃泳霖未玩先興奮，但大仔禮淳同細仔禮熙就無晒心機，點解有得玩雪都吸引唔到佢哋？全因氣溫太低，禮淳仲凍到發燒，攬住爸爸話想走，認真無奈。
出門滑雪，Brandon為家人預備厚褸、冷帽及雪褲，裝備逼爆幾個行李篋，雖然裝備絕不馬虎，但小朋友嘅禦寒能力確實唔及大人。去到滑雪場，Brandon急不及待飛馳雪地上大顯身手，更主動教四歲大仔初級滑雪，點知禮淳粒聲唔出，企埋阿媽身邊，原來刺骨寒氣令佢渾身唔自在，而一歲半嘅細仔就倒頭大睡。
大仔凍到發燒
為免家人吹西北風，Brandon係咁意滑咗一陣就執嘢走人，返到酒店，先知大仔已經冷到發燒，幸好只係微燒，並無大礙，但整晚就要同太太輪流看守囝囝等退燒，認真疲累。Brandon事後話：「雪地真係太凍，小朋友太細個唔適合，下次安排旅行，真係要諗清楚！」
旅行未能盡興，返到香港，Brandon不忘補買禮物畀囝囝，大仔愛模型飛機同車仔，細仔就鍾意玩具樂器，咁佢自己呢？買書囉！卓妮日前行過中環置地廣場地下一間書店，見到佢搜羅一本解構西裝剪裁嘅書籍，可惜睇完一輪，都係唔啱。
卓妮