政情:中環出更:「政改三人組」拍片 蝦碌鏡頭流出

政府月初就政改諮詢拍咗段三十秒宣傳片,由政務司司長林鄭月娥、律政司司長袁國強同政制及內地事務局局長譚志源(Raymond)「政改三人小組」粉墨登場。事隔近三個星期,政府前日失驚無神上載宣傳片嘅拍攝花絮,收錄三位司局長嘅蝦碌鏡頭,有貼近三人嘅消息仲踢爆,一句八個字嘅宣傳口號仲玩謝佢哋添!

三位司局長平日見慣世面,區區一條宣傳片當然冇怯場,但一分鐘「花絮」只係拍吓三人鏡頭後嘅準備工作,好似有工作人員問袁國強邊個會拍得最好,袁國強即時推舉平日好talk得嘅Raymond,話佢「平時夠鬼馬」,但Raymond就話第一次拍政府宣傳片其實好緊張,事關拍住兩位司長壓力好大喎!

八字真言 NG至少十幾次

當日有份「傍」住三人落場嘅消息人士透露,片尾三人齊聲喊出「有商有量,實現普選」呢短短幾秒就重拍(NG)咗至少十幾次。消息歸咎香港空中交通繁忙,不時有民航機同直昇機喺上空飛過,影響收音,力撐三人其實好合拍o架。其實佢哋當日要一口氣完成宣傳片拍攝、錄電台宣傳聲帶及影宣傳硬照嘅工作,算係快手快腳架喇。

卓妮

第一手消息請下載on.cc東網iPhone/iPad/Android/Windows Phone Apps