公民講場：中央祝福王維基 蘇錦樑蒙鼓裏

特首梁振英會同行政會議，早前拒絕向被指「非愛國愛港」嘅王維基旗下嘅香港電視網絡發出免費電視服務牌照，但阿爺一個「屈尾十」，又透過中移動香港轄下嘅一間子公司，以「破底價」將流動電視服務牌照賣畀港視，變相架空香港特首同行會向王維基發牌。而且今次交易，仲要揀正喺梁振英同商務及經濟發展局局長蘇錦樑啱啱上京述完職後完成，擺明玩嘢落特區政府同本港嘅愛國愛港人士面。蘇錦樑尋日出席電台節目時，就坦言對有關交易事前毫不知情，反映港府今次完全被蒙在鼓裏。