政府早前推出「大嘥鬼」公仔，向市民宣揚減少浪費、唔好亂嘥嘢嘅意識。環境局局長黃錦星前晚就陪同一隻真人扮嘅「大嘥鬼」及一批東華三院義工，落咗新蒲崗一間連鎖西餅店，了解該公司推行嘅「剩餘麵包捐贈計劃」，仲親自幫手收集餅店賣剩嘅麵包，然後再送畀東華三院何東安老院嘅院友，一齊合唱「大嘥鬼」主題曲。黃錦星一行人喺店外運送麵包期間，有小朋友好興奮咁爭住同佢哋合照，不過睇嚟呢位小朋友係鍾意「大嘥鬼」嘅造型多啲，對黃錦星就好似無乜興趣嘞！
