「貪曾」前特首曾蔭權爵士喺二○一○年發動「政改起錨騷」，強逼一眾高官同佢一齊落區，「青筋暴現」咁大嗌「起錨！起錨！起錨！」等口號，遭各界猛烈批評。當年出任特首辦特別助理、現職政制及內地事務局政治助理嘅陳岳鵬（Ronald），尋日喺一個電台節目同年輕人對話時，就畀人重提番呢段瘀爆嘅舊事，話相對現屆政府推動政改嘅「有商有量」主題，當年嘅起錨騷係咪太過激昂，過晒火位？
Ronald回應指，「起錨騷」當年已有特定方案，爭取立法會同各界支持，因此採用「激情手法」，但今次政改只係首階段諮詢，未有任何具體方案，所以採取開放兼聽態度聽意見，好似暗批緊當年貪曾唔夠開放，唔得兼聽咁。
班年輕人當然唔會咁易放過佢，有人揶揄「有商有量」其實係暗喻「有商界先有得商量」，又質問已故支聯會主席司徒華係咪愛國愛港？如果佢仍然在生參加特首普選能否「入閘」？Ronald惟有背書式回應，強調特首愛國愛港嘅要求早喺《基本法》精神體現，唔敢評論華叔半句。