政情：策發會笨策火上加油
特首梁振英今年一月重新委任策略發展委員會（策發會）成員，仲將非官守成員人數大幅減少，諗住一洗策發會形象，唔好再畀人話係大而無當嘅吹水會。新一屆策發會上個月底就開咗個會，仲對本港土地政策提咗唔少意見，其中包括將政府寫字樓搬離黃金商業區、減少郊野公園比例同興建超級監獄。樣樣建議唔係爭議性大又惹火，就係政府一早已放棄嘅計劃，面對呢啲騎呢建議，政府真係信一成都好危險。
遷軍事用地 陳茂波一早謝絕
策發會上個月三十日開咗第三次會議，會上各委員對本港寫字樓用地供應、增加土地供應嘅策略、土地用途及人口結構、唔同行業及產業嘅土地使用等幾方面發表意見。其中有人就提到，鑑於人口嘅增長，土地供應又不足，政府應該研究減少郊野公園佔地嘅比例。郊野公園發展一直都係惹火議題，環保團體實群起反對，就連政府都步步為營，策發會嘅建議無疑會為政府呢個熱廚房火上加油。
策發會又建議港府同中央政府研究，將市區軍事用地搬去其他地方，同埋考慮喺離島興建超級監獄。軍事用地呢樣嘢真係唔掂好過，早前政府諗住將中環海濱長廊部分用地劃作解放軍軍用碼頭，都面對唔少反對聲音，反對人士仲喺城市規劃委員會嘅諮詢會拉布，發展局局長陳茂波就斬釘截鐵話軍事用地唔郁得。至於起超級監獄呢個建議，其實政府喺十年前已諗過喺喜靈洲起超級監獄，點知就畀人話破壞自然生態，最終不了了之。睇嚟策發會唔係玩嘢，就係未做足功課。
中西區請人難 因為冇公屋﹖
不過最騎呢嘅都係策發會竟然叫政府搬寫字樓。政府總部同立法會都係前年先搬入添馬艦，啱啱先執漏完冇幾耐。再講櫈都未坐暖就叫人搬走唔係問題，問題係咁大個政府總部又應該搬去邊呢？最搞笑係有委員話，中西區嘅僱主好難請工人做基層工作，皆因該區冇公屋，令人口結構失衡。唔通佢哋想叫政府喺作為金融同商業中心嘅中環起公屋？睇嚟政府對策發會嘅建議真係要三思。