中環出更：「英俊」政助 表現標青過局長
東九龍居民委員會尋日舉行「我對施政報告的期望」交流會，邀請約廿名中學生表達意見，教育局政治助理施俊輝（Jeff）同民政事務局政治助理徐英偉（Caspar）拍住上。學生哥多關注教育問題，開正Jeff個瓣，Jeff有備而來，一張張貓紙傍身，表現唔錯。Caspar雖然唔熟教育，但學生哥問起其他問題佢都答得頭頭是道。兩位政助嘅表現直頭標青過佢哋上司，即係教育局局長吳克儉及民政事務局局長曾德成。
交流會準備足 引導思考
做過通識科老師嘅Jeff對住班學生哥好淡定，同學仔嘅提問包括十五年免費教育、北區學額不足以至雙非學童問題，都冇考倒佢，事關Jeff銀包袋定幾張自製貓紙，當中有齊本港過去十年出生人口、中小學生人數、雙非及單非學童數目等，做足功課，同佢上司吳得掂相比勤力好多。
Caspar就由藝術發展、街頭表演講到公屋輪候、焚化爐，乃至近日居港未夠七年可攞綜援判案嘅影響等，仲識引導學生多角度思考，相信學生都學到唔少嘢，唔知兩位局長學到未？
卓妮